Tuesday, January 6, 2015

எச்சரிக்கை... (அ) Be Careful...




எச்சரிக்கை... (அ) Be Careful...

இந்த புது வருஷ பிறப்பின் போது ரொம்பவும் உணர்ச்சிவசப்பட்டு ஏதோ  ஒரு க்ஷணத்தில் திரும்பவும் ப்ளாக் தொடருவது என்று ந்யூ இயர் ரெஷல்யூஷ வைராக்ய  உந்துதலில் சபதம் மாதிரி செய்து  விட்டேன்.

இந்த முடிவுக்கும் சமீபத்திய சனிப் பெயர்ச்சிக்கும் ஏதாவது சம்பந்தம் இருக்கிறதா என்ற ஆராய்ச்சியை உங்களுக்கே விட்டு கொடுத்து விடுகிறேன்.

ஈஸ்வரோ ரக்ஷது...

Monday, November 22, 2010

புது மொழி

BBS...

BTW...

CMi...

BIL...

PRL...

LOL...

ROFL...

WTF; whrz da p@rty?

மேலே கொடுக்கப்பட்டுள்ளவை உங்களுக்கு புரிந்தால் நீங்கள் கண்டிப்பாக 20 வயதுக்கு உட்பட்டவராக இருக்க வேண்டும்.  நீங்கள் இருபது வயதுக்கு மேற்பட்டவராக இருந்து மேற்படி சமாசாரம் முழுவதும் புரிந்தால் நீங்கள் மனதளவில் இன்னும் யூத்தாக மற்றும் கால தேச வர்த்தமானத்தோடு  up - to - date ஆக   இருக்கிறீர்கள் என்று அர்த்தம்.

மேற்படி சமாசாரம் பாதி மட்டும் புரியுமானால் நீங்கள் இருபது வயதுக்கு கீழானவர் என்றால் யூத் லிஸ்டிலிரிந்து வெறுத்து விலக்கி வைக்கப்படும் அபாயதிலிருக்கிறீர்கள்.  இருபது வயதுக்கு மேற்பட்டவர்கள் யூத்தாய் வேகமாக காலாவதியாகி வருகிறீர்கள் என்று புரிந்துகொள்ளவும்.

மேற்படி விஷயம் எதுவுமே உங்களுக்கு புரியவில்லை என்றால் நீங்கள் வயதானவர் லிஸ்டில் சேர்க்கப்பட்டு உங்களுக்கும் தற்போதைய ஜெனரேஷனுக்கும் உள்ள இடைவெளி ஒளி வருடங்களில் கணிக்கப்படும் அபாயதிலிருக்கிறீர்கள்.

மேலே கொடுக்கப்பட்டுள்ள சாம்பிள் இன்றைய புதிய தலைமுறையின் நவமொழி.  ஆங்கிலத்தில் "sms lingo" அல்லது "chatspeak".

இந்த மொழியில் தான் இன்றைய தலைமுறை மிக மிக அனாயாசமாக செல்போன்களிலும், 'ஸ்மார்ட்' போன்களிலும், ஜிடாக், யாஹூ போன்ற மெசஞ்சர்களிலும், ட்விட்டர், பேஸ்புக் போன்ற சமூக வலைதளங்களிலும் உரையாடுகிறது, பேசுகிறது, சந்தோஷிக்கிறது, வருந்துகிறது, தகவல் பரிமாறுகிறது. ஆங்கிலத்தோடு தமிழ் ஹிந்தி மற்றும் இன்னபிற மொழிகளையும் கலந்து கட்டி அவியலாய் ஊடு கட்டி அடிக்கிறது.

தான் அலை பேசிக்கொண்டிருக்கையில் அருகாமையில் பெற்றோர் இருந்தால் PRL PCMi later என்று குறுஞ்செய்தி அனுப்புகிறது.  இம்மாதிரி குறுஞ்செய்திகளைப் படிக்க நேர்ந்தால் அதன் அர்த்தம் என்னவென்றே தெரியாமல் பெற்றோர்கள் "ஞே" என்பதையும் தாண்டி முழியோமுழி என்று முழிக்கிறார்கள்.

இந்த மொழியில்  cryptical தன்மை கொஞ்சம் மற்றும்  convenience நிறைய என்று தோன்றுகிறது.
செல்போன்கள் வந்த காலத்தில் சிறிய கீபோர்டில் மெசேஜ் டைப் பண்ணும்  அசௌகர்யங்களில் இந்த மொழியின் தோற்றுவாய் இருந்திருக்கும் சாத்தியங்கள் ஏராளம்.  முன்புபோல் இல்லாமல் தற்போது டைப்ரைடிங் இன்ஸ்டிடியூட்கள் வழக்கொழிந்து போனதும் ஒரு காரணி என்றே சொல்லத்தோன்றுகிறது. ட்விட்டர் போன்ற சமூக வலைதளங்களில்  140 கேரக்டர்களுக்குள் தங்களின் கருத்தை சொல்லவேண்டிய நிர்பந்தம் போன்றவை இம்மொழியின் வளர்ச்சிக்கு உரமாயிருந்திருக்கிறது என்பதில் எந்த சந்தேகமும் இல்லை. இம்மொழியின் cryptic தன்மை காலப்போக்கில் ரகசியம் கருதி ஏற்பட்டிருக்கலாம்.
 
இம்மொழிக்கு எதிராக பலவிதமான விமர்சனங்கள் வைக்கப்படுகிறது.  ஒழுங்கான வார்தையமைப்பு இல்லை; இலக்கணம் அறவே இல்லை; சின்டாக்ஸ் இல்லை என்றெல்லாம்.  ஏன் இதெல்லாம் மொழியே இல்லை என்று விமர்சிப்பவர்களும் உண்டு. இந்த விமர்சனங்களில் உண்மை இருந்தாலும், அப்படி விமர்சிப்பவர் "பழம் பஞ்சாங்கம்" என்று முத்திரை குத்தப்பட்டு ஒதுக்கித் தள்ளப்படும் அபாயமான சாத்தியக்கூறு தான் தென்படுகிறது.  மேலும், இதனால் எங்களுக்கு ஒன்றும் நஷ்டமில்லை.  நீங்கள் எங்களை தொந்தரவு செய்யாமல் உங்கள் தி ஹிந்து ந்யூஸ்பேப்பர் மற்றும் ஆக்ஸ்போர்ட் டிக்ஷனரி மற்றும் ரென் அண்டு மார்டின் இவைகளை கட்டிக்கொண்டு சௌக்கியமாய் இருங்கள் என்று அவர்கள் சொல்லக்கூடும். இம்மொழி தற்போது அலுவலகங்களில் அனுப்பப்படும் ஈ -மெயில்களிலும் மெல்ல ஊடுருவல் செய்திருப்பது தான் கொஞ்சம் கவலை அளிக்கிறது.  ஒரு சாரார் இதைக் கண்டு முகம் சுளிக்கிறார்கள்.  வருந்துகிறார்கள்.


இதற்க்கு தீர்வுதான் என்ன? என்று அறிந்துகொள்ள சாலமன் பாப்பையாவை வைத்து பட்டிமன்றம் நடத்தினால், அவர் "பழகிப் பாப்போம்யா, அப்பத்தேன் புரியும்.  போங்கய்யா! நல்லா பழகுங்க" என்றே தீர்ப்பு சொல்லக் கூடும்.

என்ன?

r u redi 2 join da p@rty?

***********************************************


பெயர் பலகையில் தமிழ் வளர்க்கும் முயற்சியில் சில சுவாரஸ்யங்கள் :

ஸ்வீட் ஸ்டால்  - இனிப்பகம்...
ஸ்நாக்ஸ் பார் - நொறுவையகம்...
டீ ஸ்டால்  - தேநீரகம்....
பேக்கரி  - அடுமனையகம்...
சலூன்  - முடிதிருத்தகம்...
ஹார்டுவேர் - வன்பொருளகம்...

ஒரு சின்ன சந்தேகம்!!

இப்படி அகம்.. அகம்.. என்றே எல்லாம் தமிழ் 'படுத்த'ப்பட்டிருக்கும் போது toilet என்பதற்கு மட்டும் ஏன் கழிப்பகம் (அ) விடிப்பகம் (அ) பேளகம் என்று மாற்றாமல் கழிப்பறை என்றே விட்டு வைத்திருக்கிறார்கள்?

சரியான விடை தெரிந்தவர்கள் கூறினால் அவர்களுக்கு வரும் தமிழக சட்டமன்ற தேர்தலில் ஓட்டுக்கு ஐயாயிரம் ரூபாய் கூடுதலாய் கிடைக்கும்படி இயற்கையிடம் பிரார்த்தனை செய்கிறேன். 

Saturday, July 24, 2010

மொட்டை தலையும் ... முழங்காலும்....

மொட்டை தலைக்கும் முழங்காலுக்கும் முடிச்சு போடுவது என்பார்களே...
அது உண்மையாகிவிடும் போலிருக்கிறது...

பசு மாடுகளுக்கும் அதி நவீன கணினி தரவு மையத்திற்கும் (data center) என்ன சம்பந்தம் இருக்க முடியும்?

சம்பந்தம் இருக்கிறது என்கிறது உலகின் முன்னணி  கணினி தயாரிப்பு நிறுவனமான  ஹ்யூலட் பக்கார்ட் (HP ).

இன்றைய தகவல் தொழில் நுட்ப உலகில் கணினி தரவு மையம் என்பது தவிர்க்க முடியாத தேவையாக இருக்கிறது.  இந்த தரவு மையங்களினால் நம் சுற்றுச் சூழலுக்கு ஏற்படும் பாதிப்புகள் ஏராளம். தரவு மையங்களிலிருந்து வெளி வரும் வெப்பம், அதை இயக்க தேவைப்படும் மின்சாரம், மின்சார உற்பத்தியில்  ஏற்படும் சுட்ட்றுச் சூழல் கேடுகள், அந்த மையங்களுக்கு தேவையான குளிர் சாதனம், அதனால் ஏற்படும் சுற்றுச் சூழல் மாசுகள் என்று அடுக்கிக் கொண்டே போகலாம். வேகமாக வெப்பமயமாகிவரும் உலகை மேலும் வெப்பமயமாகாமல் தடுக்க உலகெங்கும் ஆராய்ச்சிகள் நடந்து வருகின்றன.  முன்னணி கணினி நிறுவனங்களும் தற்சார்பு முறையில் இயங்கும் தரவு மையங்களுக்கான (sustainable data centers ) ஆராய்ச்சி செய்து வருகின்றன.  அம்மாதிரியான ஆராய்ச்சியில் தான் அமெரிக்காவில் இருக்கும் HP லாப்ஸ் இவ்வாறு கண்டறிந்திருக்கிறது.

10000 மாடுகளைக் கொண்ட ஒரு பண்ணையிலிருந்து கிடைக்கும் கழிவுகளில் இருந்து ஒரு மெகா வாட் திறன் கொண்ட தரவு மையத்தை தற்சார்பு முறையில் இயக்கலாம் என்கிறார்கள் HP லாப்ஸ் விஞ்ஞானிகள்.   தரவு மையத்திலிருந்து வெளி வரும் வெப்பத்தை பயன் படுத்தி பண்ணை கழிவுகளை சிதைத்து வரும் மீத்தேன் வாயுவிலிருந்து மின்சாரம் தயாரிக்கப்பட்டு அந்த மின்சாரத்தினால் தரவு மையத்தை தற்சார்பு முறையில் இயக்கலாம் என்று சொல்கிறார்கள். இதனால் சுற்றுச் சூழல் பாதிப்புகள் பெரிதும் குறைக்கப்படுகிறது என்கிறார்கள்.

இது எப்படி இயங்குகிறது என்று மேலும் புரிந்துகொள்ள கீழே இருக்கும் படத்தைப் பார்க்கவும்.


இந்தியாவின் வளர்ச்சிக்கு அதன் கிராமங்கள் தான் முதுகெலும்பு என்றார் காந்திஜி. நாம் தான் அதை சரியாக புரிந்து கொள்ளவில்லையோ  என்று நினைக்கிறேன். எதிர் காலத்தில் இந்தியாவில் லட்சக்கணக்கில் இருக்கும் ஒவ்வொரு கிராமத்திலும் ஒரு பால் பண்ணை, அதை சார்ந்த கணினி தரவு மையம் என்று நினைத்துப்பார்த்தால் அதன் சாத்தியங்கள் மலைக்க வைக்கிறது.  அவ்வாறு நினைக்கும் பொழுது பசுக்களை பெரிதும் நேசிக்கும் நம்முடைய 'பசுநேசன்' ராமராஜனும், லாலு பிரசாத் யாதவ்வும்  hp போன்ற தகவல் தொழில் நுட்ப கம்பெனிகளுக்குத்  தலைவராகும் விபரீத சாத்தியமும் தென்படுவது நம்முடைய பாக்கியமா என்றால் சொல்லத் தெரியவில்லை. 



********************************************


அட்டையை தவிர்த்துவிட்டு படித்தால் பெரும்பாலான  பத்திரிகைகள் குமுதம் போலவே இருக்கிறது என்று சில வருடங்களுக்கு  முன் எழுத்தாளர் சுஜாதா அவர்கள் குறிப்பிட்டிருந்தது நினைவிருக்கிறது.  இப்போது அட்டையை தவிர்த்துவிட்டு படித்தால் பெரும்பாலான  பத்திரிகைகள் "முரசொலி" போலவே இருக்கிறது என்று தான் சொல்லத் தோன்றுகிறது.

Sunday, April 11, 2010

கத்திரிக்காய் கசக்குதய்யா

காதலாவது கத்திரிக்காயாவது என்று ஒரு சொலவடை நம்மிடையே புழக்கத்திலிருக்கிறது.  கொஞ்சம் யோசித்தால், இக்காலத்தில் காதலால் ஏறக்குறைய ஒரு பிரச்சனையும் இல்லை என்றே சொல்லலாம்.  இப்போது பிரச்சனை எல்லாம்  கத்திரிக்காயால் தான்.

ஆமாம்.  நீங்கள் நினைப்பது சரிதான். 

மரபணு மாற்றப்பட்ட BT கத்திரிக்காய் தான்.

ஆனால்,  BT  கத்திரிக்காய் பற்றியோ அதன் சாதக(?) பாதகங்களைப் பற்றியோ இங்கு நான் பிரஸ்தாபிக்கப் போவதில்லை. அது பற்றி படிக்க விருப்பமிருப்பவர்கள் சுஜாதா தேசிகனின் வலைப்பூவில் படிக்கலாம்.  லிங்க் இதோ!
http://solvanam.com/?p=6484

நான் சொல்ல விழைவதெல்லாம் இந்த BT கத்திரிக்காயால் என் போன்ற கத்திரிக்காய் ரசிகர்களுக்கு நேர்ந்திருக்கும் சங்கடங்களைப் பற்றித்தான்.

ஆழ்ந்த வயலட் கலரில் (கத்திரிக்காய் கலர்?) வெள்ளை வரிகளுடனோ அல்லது வரி இல்லாமலோ பச்சை கிரீடத்துடன் குப்பலாய் கடையில் கூடையில் பிஞ்சுக் கத்திரிக்காய்கள் குவிந்திருக்கும் உள்ளம் கொள்ளை கொள்ளும் காட்சியே தனி அழகுதான். 

பிஞ்சுக் கத்திரிக்காய் தான் எத்தனை அழகு?


திண்மையும் மென்மையும் கொண்ட உடல், பள பளக்கும் தோல், பெண்களின் காதோரம் வழிந்தொழுகும் சிறிய முடிக்கற்றைப போல அமைந்திருக்கும் பச்சை கிரீடத்தின் அமைப்பு, நவ யுவதிகளின் காது மாட்டல் போல வளைந்திருக்கும் காம்பு, கணுக்காலுக்கு மேலே வெளிப்படுவதைப்போல பிஞ்சுக் கத்திரிக்காயை நறுக்கினால் வெளிப்படும் பளீர் வெளுப்பு...

ஒரு இளம் பெண்ணின் அழகுக்கு சற்றும் குறைவானதல்ல பிஞ்சுக் கத்திரிக்காயின் அழகு என்பது என் அபிப்ராயம்.

அழகு இப்படியென்றால், அதன் சுவை..

நினைக்கும் பொழுதே  நாவினில் சுவைநீர்களின் குற்றாலப் பிரவாஹம்...

நல்ல பொடியான பிஞ்சுக் கத்திரிக்காய்களை காம்பை மட்டும் நீக்கி, நான்காய் கீறிப் பிளந்து மசாலா பொடி திணித்து நிறைய எண்ணெய் விட்டு, அந்த எண்ணையிலேயே வெந்த "எண்ணைக் கத்திரிக்காய்";
நீளவாக்கில் அரிந்து சிம்பிளாய் வெறும் வரமிளகாய் சீரகம் மற்றும் காயம் தாளித்து கமகமவென்று கத்திரிக்காயின் வாசத்துடன் காயம் சேர்ந்து மணக்கும் எண்ணெய் வதக்கல்;
ஆந்திரா ஸ்டைல் ரசவாங்கி;
கருப்பு கொத்துக்கடலை சேர்த்து கருவடாம் தாளித்து செய்யப்படும் கத்திரிக்காய் கூட்டு;
சற்றே பெரிய சைஸ் கத்திரிக்காய்களை தணலில் சுட்டு உரித்து மசித்து காயம் மற்றும் வரமிளகாய் தாளித்து தன் நீரிலேயே வெந்த கத்திரிக்காயின் மணத்துடன்  செய்யப்படும் துவையல்;
இதையே தக்காளி வெங்காயம் மசாலா சேர்த்து செய்யப்படும் வடநாட்டு "பைங்கன் பர்த்தா";
சுட்டு மசித்த கத்திரிக்காய்களை வெங்காயம் மற்றும் கீறிய பச்சை மிளகாய்களை சேர்த்து கொஞ்சம் தூக்கலாய் புளிக்கூட்டி செய்யப்படும் பொங்கல் மற்றும் இட்லிக்கு ஏர்வையான கொத்சு;
வெங்காயம், கொத்தமல்லி மசாலா மணக்கும் கத்திரிக்காய் சாதம் "வாங்கிபாத்"...

ம்ம்ம்ம்...

விவரிக்கும் போதே மேலே தொடரமுடியாமல் சுவைநீர் வழிந்து சட்டை நனைந்தாகிவிட்டது.

இப்படி, "எத்துணைக் கோடி கத்தரிக்காய் கறிகள் வைத்தாய் இறைவா" என்று ஆனந்தக் கூத்தாடும் அளவுக்கு ரசிகன். இந்தமாதிரி வெறித்தனமாய் நான்மட்டும் தனியாளாய் இல்லை என்று நினைக்கிறேன்.

இப்படி கத்திரிக்காயுடன் காதலாய் போய்க்கொண்டிருந்த வாழ்க்கையில் வில்லனாய் நுழைந்திருக்கிறது BT கத்திரிக்காய். (அசல் வில்லன் அதை அறிமுகப்படுத்தியிருக்கும் மான்சாண்டோ எனப்படும் அமெரிக்க பன்னாட்டு பூச்சிக்கொல்லி மற்றும் விதை நிறுவனம் தான்)

அரசாங்கம் இது சம்பந்தமாய் தற்காலிகமாய் தடை விதித்திருந்தாலும் நம் நாட்டில் அதையெல்லாம் மீறி புழக்கத்தில் வர ஏராளமாய் வழிகளிருக்கின்றன.

அதனால், முன்பு காதலுடன் பார்த்த கத்திரிக்காய்களை இப்பொழுது சற்று கிலியுடன் தான் பார்க்க முடிகிறது.  
BT கத்திரிக்காய் பற்றி அறிந்தவன் கண்களுக்கு எல்லா கத்திரிக்காயும் பேயாய் தெரிகிறது.  முன்பு இதே கத்திரிக்காய்தான்  பெண்ணாய் தெரிந்தது!!

(அதெப்படி, பெண்ணும் பேயும் எப்போதும் சேர்ந்தே வருகிறது?  பிரித்தே பார்க்க முடியாமல் அப்படி அவர்களுக்குளே என்ன சம்பந்தம்?)

காசியாத்திரை சென்றால் மிகவும் பிடித்தமான காய், கனி வகைகளில் ஒன்றை விட்டுவிட்டு வருவது மரபு.  வயதான பின்பு நான் காசியாத்திரை போகும் பொழுது  கத்திரிக்காயை விட்டு விட்டு வரலாம் என்று எண்ணியிருந்தேன். இப்போது  வெகு சீக்கிரமே காசியாத்திரை போவது  என்று முடிவெடுத்து விட்டேன்.

பி.கு.: BT கத்திரிக்காய் வருவதற்கு ஆதரவாய் ஊடகங்களில் பிரச்சாரம் செய்பவர்களுக்கு குடிப்பதற்கு பூச்சிகொல்லி காக்டைலும் DDT தூவப்பட்ட உணவும் சாப்பிடுவதற்கு கொடுக்கப்பட வேண்டும் என்று ஒரு வாசகர் தி நியூ இந்தியன் எக்ஸ்ப்ரெசில் கடிதம் எழுதியிருந்தது அதில் வெளிப்படும் தார்மீக கோபத்தை தாண்டி ரசிக்கத்தக்கதாயிருக்கிறது.

Friday, April 9, 2010

From my Archives - I

போன வாரம் எதையோ தேடப்போய் லாப்டை குடைந்துக்கொண்டிருந்ததில் சுமார் 8 -10 வருடங்களுக்கு முன்பாக நான் எழுதி வைத்திருந்த நோட்பேட் ஒன்று சிக்கியது.  தேடுவதை மறந்து அதை புரட்டிப்பார்த்ததில் அக்காலத்தில் நான் எழுதிவைத்தவை அதிலிருந்தது.  அந்த ஆர்கைவ்சிலிருந்து ஒன்று உங்கள் பார்வைக்கு.. எடிட் செய்யப்படாமலேயே..

பின்புலம்:
அப்போது வலைப்பதிவு இருக்கவில்லையோ அல்லது நான் பரிச்சயமில்லாமல் இருந்தேனோ தெரியவில்லை. ஒரு தனிச்சுற்று சிற்றிதழ்  pdf பார்மெட்டில் சுமார் நான்கைந்து பக்கங்களுக்கு தயார் செய்து ஈமெயில் மூலம் விநியோகம் செய்யலாம் என்று உத்தேசித்திருந்தேன்.  அது வெறும் உத்தேசமாகவே முடிந்து  விட்டது என்று சொல்லித்தெரிய வேண்டியதில்லை.  அதற்காக நான் எழுதிய முன்னுரை இது.

"இதனால் சகலமானவர்களுக்கும் அறிவிப்பது என்னவென்றால்" என்று நேரடியாக ஆரம்பிக்க ஆசை தான். ஆனால் நீங்கள் எல்லோரும் ஒத்துக்கொள்ள வேணுமே...

எதற்கு இவ்வளவு பீடிகை?

என்ன ஆசை?

நீங்கள் எல்லோரும் தினமும் செய்தித்தாள் படிக்கிறீர்களா? வார மற்றும் மாத சஞ்சிகைகளை படிக்கிறீர்களா?

ஒன்று கவனித்திருப்பீர்களே!!

"இரும்பு பிடித்தவன் கையும் சிரங்கு பிடித்தவன் கையும் சும்மா இருக்காது"

இப்போது பேனா பிடித்தவனையும் இந்த வரிசையில் இணைத்துக்கொள்ளலாம்.

சரி. யாரெல்லாம் பேனா பிடிக்கிறார்கள்?

மிஸ். அமிஞ்சிக்கரை, சின்னத்திரையில் 'டமில் பேஸும்' குட்டை பாவாடைப் பெண், சமீபத்தில் வெற்றிப் படம் கொடுத்த இயக்குனர், தனக்குத்தானே பல்வேறு பட்டம் சூட்டிக் கொண்டவர், 'சோஷியலைட்டுகள்' (இவர்கள் என்ன செய்கிறார்கள் என்று யாராவது புரிய வைத்தால் அவர் சென்னைவாசியாக இருக்கும் பட்சத்தில் தினமும் ஒரு வேளை குளிப்பதற்கு தண்ணீர் கிடைக்க வேண்டி பிரார்த்திக்கிறேன்.), தொழிலதிபர்களின் மனைவிகள், ஓய்வுப் பெற்று வீட்டில் சும்மா இருக்கும் அரசு அதிகாரிகள், பரபரப்பான வழக்கில் தண்டனைக்குள்ளான குற்றவாளிகள்...

இப்படி பட்டியல் தண்ணீர்குட வரிசையாய் நீண்டுகொண்டே போகிறது...

இவர்களுக்கெல்லாம் என்ன தகுதி?

பிராபல்யம்?
அனுபவம்?
மொழி அறிவு?
புலமை?
தொழில் வித்தகம்?

இம்மாதிரி ஏதாவது காரணங்கள் இருப்பினும், எதோ குறைவு இருப்பதாகவே படுகிறது.

இப்போது ஊகித்திருப்பீர்களே!!

ஆமாம்.  மாதம் இருமுறையோ, மாதா மாதமோ என் எண்ணங்களை (ஒரு சின்ன வட்டத்திற்கு) பகிர்ந்து கொள்ளலாம் என்று உத்தேசித்துள்ளேன்.  தினசரிகளில் வரும் சின்டிகேடட் பீச்சர்ஸ் மாதிரி, "கற்றதும் பெற்றதும்" மாதிரி...

என்ன, ரெடியா?

ரெடியில்லாதவர்கள் 'இது தேவையில்லை' என்று விண்ணப்பித்தால் அடுத்த முறை அனுப்பப்பட மாட்டாது.  அம்மாதிரி விண்ணப்பிக்கிறவர்களை ஒசாமா பின் லேடன் கடத்தட்டும்.

Monday, March 1, 2010

லொள்ளு பக்தி

பக்தியில் எத்தனையோ வகை உண்டு என்று கேள்விப்பட்டிருக்கிறோம்...

சத்யராஜ் ஸ்டைல் பக்தி பற்றி கேள்விபட்டிருக்கிறீர்களா? அதாங்க... லொள்ளு பக்தி!!
சமஸ்க்ரிதத்தில் "நிந்தா ஸ்துதி" என வழங்குவதை தற்க்காலதிர்கேற்ப "லொள்ளு செய்து பக்தி செய்தல்" என்று தமிழ்ப்படுத்தலாம் சாரி...தமில் படுத்தலாம் தானே?

இரண்டு தமிழ்ப்புலவர்கள். ஒருவர் நொண்டி. மற்றவர் குருடு.
இருவரும் பாடி பரிசில் பெற்று காட்டுவழியே வருகையில் இருட்டி விட்டது. இரவைக் கழிக்க அங்கிருந்த பிள்ளையார் கோவிலில் தங்கினார்கள்.  இவர்களைப் பின்தொடர்ந்த திருடன் அவர்கள் தூங்கும் பொழுது பரிசிலை திருடிக்கொண்டு கோவிலிலேயே மறைந்திருந்தான்.

புலவரிருவரும் பொருள் களவு போனதை அறிந்து பிள்ளையாரைப் பார்த்து இவ்வாறு பாடினர்.

தம்பியோ பெண் திருடி
தாயாருடன் பிறந்த வம்பனோ
நெய் திருடும் மாயன்
அம்புவியில் மூத்த பிள்ளையாரே! முடிச்சு அவித்தீர்
போமோ கோத்திரத்துக்குள்ள குணம்.

இதைக்கேட்ட பிள்ளையார் பக்தனான திருடன் நம்மால் பிள்ளையாருக்கு கெட்ட பெயர் வந்துவிட்டதே என வருந்தி அந்த புலவர்களிடம் மன்னிப்புக் கோரி அவரது பொருளை ஒப்படைத்தானாம்.

அதே மாதிரி இன்னொரு புலவர் (இவர் சம்ஸ்க்ருதம்) பிள்ளையாரை நோக்கி
"பூமிக்கு தலைவனை அண்டினால் பூமியை கொடுப்பார்கள்
பணத்திற்கு தலைவனை அண்டினால் பணத்தை கொடுப்பார்கள்
விக்னேஸ்வரனான உன்னை அண்டினால் விக்னத்தை அல்லவா கொடுப்பாய்
உன்னை என் பக்கமே வராதே என்று ஆயிரம் முறை நமஸ்கரிக்கிறேன்"
என்று பொருள்பட பாடியிருக்கிறார்.

இந்த இரண்டு லொள்ளிலும் பிள்ளையாரே மாட்டியிருக்கிறாரே!! மற்ற கடவுளெல்லாம் ரொம்ப கோபக்காரர்களோ?

பி.கு: மற்ற  கடவுளைப் பற்றி இம்மாதிரி "லொள்ளு" இருந்தால் தெரியப்படுதுங்களேன். இவ்வலைப்பூவில் பிரசுரிக்கலாம்.

Wednesday, February 3, 2010

ஒரு சேவை.. ஒரு ஆராய்ச்சி..

ஒரு மதியம் அலுவலகத்தில் சாவகாசமாய் வலை உலவிக்கொண்டிருக்கையில் ஒரு செய்தியை பார்த்தவுடன் ஏறத்தாழ சேரிலிருந்து கீழே விழ நேர்ந்தது.

பெண்களின் மார்பகங்களை உற்று நோக்குவதால் ஆண்களுக்கு நீள்கிறது.. ஆயுள்  என்கிறது ஒரு மேலைநாட்டு ஆராய்ச்சி.

மார்பகங்களை குறைந்த பட்சம் பத்து நிமிடங்கள் உற்று நோக்கி ஜோள்ளுவதால்   ஆண்களின் ஆயுள் ஐந்து ஆண்டுகள் நீட்டிக்கப்பெருகிறதாம்.

அடடா.. அடடா...அபாரம்...
புல்லரிக்கிறது...
எப்படியெல்லாம் ஆராய்ச்சி செய்கிறார்கள்...
ஆராய்ச்சி என்றால் இதுவல்லவோ?

பாவம் பெண்கள். ஆயுள் நீள்வதற்கு அவர்கள் எதை உற்று நோக்குவார்கள்? ஒருவேளை அதற்கும் ஆராய்ச்சி நடக்கிறதோ என்னமோ? காத்திருப்போம்.

கல்யாணமான ஆண்களின் உயிரை அவரின் மனைவிமார்களாகிய (இந்த செய்தி படித்ததிலிரிந்து வார்த்தைகளெல்லாம் எப்படி வருகிறது பாருங்கள்..) பெண்மணிகள் கொஞ்சம் கொஞ்சமாய் பிடுங்கி எடுப்பதால் ஏற்படும் ஆயுள் குறைவை நிவர்த்தி செய்ய அவர்கள் மூலமாகவே ஒரு தீர்வையும் அளித்து...அடடா..அடடா.. என்ன ஒரு பொயடிக் ஜஸ்டிஸ்... இயற்கையின் கருணையே கருணை...

இப்போது ஒரு உண்மை புலப்படுகிறது..
நம் வெகு ஜன பத்திரிகைகள் இந்த சேவை நோக்கில் தான் நடிகைகளின் ஏறக்குறைய திறந்த மார்பகங்களின் படங்களை ஏராளமாக வெளியிடுகிறது.  not to attact eyeballs. என்னே அவர்களின் தீர்கதரிசனம்?  அவைகளின் உயரிய இச்சேவையை உண்மை தெரியாமல் நாம் தான் இத்தனை காலமாய் தவறாய் குறை சொல்லிக் கொண்டிரிந்திருக்கிறோம்..
இம்மாதிரியான ஒரு மகத்தான சேவையை பாராட்ட மனமில்லாவிட்டாலும் இனிமேலாவது மனம் திருந்தி விமர்சிக்காமல் இருக்கலாமே. அவ்வாறு விமர்சித்தவர்கள் இப்போது முகத்தை எங்கே வைத்துக் கொள்வார்களோ? பேசாமல் தீர்த்த யாத்திரை கிளம்பி இந்த பஞ்சமஹா பாதகத்தை போக்கிகொள்ளுவதுதான் அவர்களுக்கு இருக்கும் ஒரே வழி.
இதே சேவை தான் தொலைகாட்சிகளிலும் "மானாட மயிலாட", "ஜோடி நம்பர் 1 , ராணி ஆறு ராஜா யாரு போன்ற ரியாலிட்டி ஷோக்களின் அடிநாதமும்  என்று சொல்ல தேவையே இல்லை. இது செய்தி நாளேடுகளின் page 3 பக்கங்களுக்கும் பொருந்தும்.

இந்த ஆராய்ச்சி தகவலை வெளியிட்டது  இம்மாதிரி page 3 கலாச்சாரத்திற்கு வித்திட்ட முன்னோடியான "The Times of India" தான் என்பது ஆச்சர்யம் அளிக்கவில்லை.

படிக்க க்ளிக்கவும்:
http://timesofindia.indiatimes.com/life/health-fitness/health/Stare-at-boobs-to-live-longer/articleshow/5304136.cms

Wednesday, May 6, 2009

நான் கடவுள்

எச்சரிக்கை: இந்த தலைப்பை பார்த்தவுடன் நீங்கள் இதை பாலாவின் "நான் கடவுள்" பற்றிய மற்றுமொரு வலைப்பதிவு என்று நினைப்பீர்களானால் நீங்கள் இத்துடன் நிறுத்திவிட்டு படிக்காமல் விலகிக்கொள்வது நல்லது. அப்படி விலகாமல் உங்கள் சொந்த ரிஸ்கில் இதை படிக்கத்தொடர்வீர்களானால் நான் பொறுப்பாளி அல்ல.

நீங்கள் பொன்னியின் செல்வன் படித்திருக்கிறீர்களா?

கல்கியின் முத்திரைப்படைப்பு அவரின் வசீகர தெள்ளிய நடை, பாத்திரப்படைப்பு இவை எல்லாம் காலை சாப்பிட்ட முதல் டிகாக்ஷன் காபி சுவைபோல நினைக்குந்தோறும் மனதில் மணம் பரப்பும்மே!

அதில் உங்களுக்கு வந்தியத்தேவன், ராஜராஜன், குந்தவை போன்ற மெயின் கதாபாத்திரங்களுள் யாராவது ஒருவரோ அல்லது எல்லோருமோ உங்களுக்கு மிகவும் பிடித்தமானவர்களாயிருக்கக்கூடும்.

அக்கதையில், இவர்களுக்கு இணையாக கதை முழுவதும், ரஜனி படத்தில் செந்தில் மாதிரி, வரும் ஆழ்வார்கடியானை நினைவிருக்கிறதா?

எப்படி மறக்க முடியும்? உடல் முழுதும் வைணவத் திருச்சின்னங்களும் கையில் குண்டாந்தடியுமாய் கல்கி அவரை படைத்து கதை நகர்த்தியது மறக்கக் கூடியதா?

அவர் ஒரு தீவிரt வைணவர். அந்த பற்றினால் சைவத்தையும் சிவனையும் எள்ளி நகையாடுவார். கல்கியின் வரிகளில் அவரது நகையாடல்களில் ரசமிருக்கும். படிப்பவரை புன்முறுவலுடன் ரசிக்க வைக்கும்.

அதே சமயம், விஷ்ணுவை மற்றவர் குறைவாய் பேசும் போது அவர் கொள்ளும் ஆவேசம் நம்மை பதைபதைக்கச் செய்யும்.

அவர் கடவுள் விஷ்ணு. அவர் தான் பெரியவர். அவர் தான் கடவுள்.

அதே போல் வீரசைவர்களுக்கு சிவன் தான் கடவுள். அவர் தான் பெரியவர். அவர் தான் கடவுள்.

"அரியும் சிவனும் ஒண்ணு; அறியாதவர் வாயிலே மண்ணு..."

"அவரவர் கடவுளர் குறைவிலர்..."

"சிவா விஷ்ணு அபேதம்"

இப்படியெல்லாம் சொல்லப்படிருதாலும் "என் கடவுள் தான் பெரியவர்/சிறந்தவர்" போக்கு நம் சமுதாயத்தில் வேறோடியிருப்பது கண்கூடு.

இதே கருத்து நாத்திகம் பேசும் கமலின் தசாவதாரத்தில் மிகைபடுத்தப்பட்டிருந்தாலும், காலம் காலமாய் மக்களின் sub-consciousல் ஆழப் பதிந்திருப்பத்தின் வெளிப்பாடே அது என்று உணர்த்துகிறது.

இது எதோ இந்து மதத்தில் தான் என்றில்லை; உலகலாவியது.

இஸ்லாமியர்கள் மற்றவர்களை காபிர்ஸ் (kafirs) என்றும் கிறிஸ்தவர்கள் பகன்ஸ் (pagans) என்று வழங்குவதும் இதை உறுதிப்படுத்தும்.

இது ஏன் என்று யோசித்திருக்கிறீர்களா?

காரணம் இருக்கிறதா?

இருக்கவேண்டுமே!

வேதாந்தம் விடை தருகிறது.

"தத் தவம் அசி..." "அஹம் ப்ரமாஸ்மி..."

வேறு வேறல்ல...

எல்லாமே ஒன்று தான்.

ஆம். அத்வைதம் தான் காரணம்.

வியப்பாயிருகிறதல்லவா?

கடவுளை பலர் பலவாறு விவரித்திருக்கிறார்கள்...

ஆதி அந்தமில்லா அருட்பெருஞ்சோதி...என்று மாணிக்கவாசகர் திருவாசகமாய் அருளியதை உருவகப்படுத்திப் பார்க்க கொஞ்சம் ச்ரமப்படத்தான் வேண்டியிருக்கிறது...

முக்காலமும் நீ; அதையும் தாண்டி காலத்தை கடந்தவனும் நீ...

முக்குணமும் நீ; அதையும் தாண்டி நிற்குணமாய் இருப்பவனும் நீ...

முச்சக்தியும் நீ; அதையும் தாண்டி சிவமாய் இருப்பவனும் நீ...

நீயே பிரும்மா...

நீயே விஷ்ணு...

நீயே சிவன்...

நீயே இந்திரன், சூரியன், சந்திரன், அக்னி, நிலம், நீர், காற்று, ஆகாயம்.....

நீயே எல்லாமும்...

இவ்வாறு பொது குணங்களால் போற்றப்படுகிறது....

இது சிவனுக்கும், விஷ்ணுவிற்கும் கூறப்பட்டிருக்கிறது...

ஏன்... எந்த கடவுளானாலும் இப்படி போற்றப்படிருக்கின்றது.

ம்ம்...

அப்படியானால் யார் பெரியவர்?

"அலகிலா விளையாட்டுடையான்..." என்பதற்கேற்ப பரப்ரும்மம் சங்கல்பித்துக்கொண்டு விளையாட்டாய் பிரபஞ்சத்தைப் படைத்து முத்தொழில் புரிய முக்கடவுளையும் படைத்தது...

அத்வைதம், எல்லோரும் அந்த ப்ரும்மமே அல்லது பிரும்மத்தின் ஸ்வரூபமே என்கிறது.

அப்படியானால், பிரம்மா விஷ்ணு சிவன் எல்லோரும் அந்த ultimate ஆன பிரும்மம் தானே...

அப்படியானால், அந்த ultimate பிரம்மத்தின் சிறப்புகள், குணாதிசயங்கள் எல்லாம் இவர்களுக்கானது என்று சொல்வதில் தவறில்லையே...

விஷ்ணுவை பிரும்மம் என்று பார்த்தால் அவர்தான் ultimate... சிவனைப்பர்த்தால் அவர் தான் ultimate...

ultimate ஆன பிரும்மத்தின்

ஸ்வரூபம் எல்லோர் மீதும் ஏற்றி கூறப்பட்டிருப்பதால் ஒன்றை மற்றும் தனியாய் பார்ப்பவர்க்கு அவர் தான் ultimate என்று படுவதில் தவறில்லையே...

இந்த லாஜிக்கை கொஞ்சம் விஸ்தாரப்படுதினால்....

அல்லா தான் ..., யேசுதான்..., உலகநாதன் தான்...., மாடசாமி தான்...

நீ தான்..., நான் தான்... ultimate....

உலகநாதன், மாடசாமி, நீ, நான் மற்றெல்லாரும் பிரும்மம்...

எல்லாமே பிரும்மம்.

இதை உணர்ந்த நிலையில்,

வைஷ்ணவன் இல்லை; அவனே விஷ்ணு....

சைவன்இல்லை ; அவனே சிவன்...

இஸ்லாமியன் இல்லை; அவனே அல்லா...

கிறிஸ்தவன் இல்லை; அவனே கிறிஸ்து...

என் கடவுள் இல்லை; நான் கடவுள்...

நானே கடவுள்...

இதைத்தான் ஓஷோ,

கிறிஸ்தவனாய் இராதே, நீயே க்ரிஸ்துவாகு; புத்த மதத்தவனாய் இராதே, நீயே புத்தனாகு என்கிறார். எத்துணை சத்தியமான வாக்கியம்?

"கண்டவர் விண்டிலர்; விண்டவர் கண்டிலர்"

ஏனென்றால், கண்டவர் கண்ட பொருளாய் ஆகிவிடுவதால் விண்டுவதற்கு யாருளர் ?

எனவே, காணும் வரையில் இது போன்று விண்டுகொண்டிருப்போம்.

பி.கு.: இந்த வலைப்பதிவு என் குருஜிக்கு சமர்ப்பணம். எனென்றால், போறபோக்கில் எளிமையாய் ஒரே வரியில் அவர் கூறியதைப் பற்றி சிந்தித்து விவரித்து எழுதப்பட்டதே இந்த வலைப்பதிவு. இந்த வலைப்பதிவில் எதாவது தவறிருக்குமாயின் அது என்னுடையதே.

Saturday, April 11, 2009

நியூஸ் பேப்பர் - பார்ட் II

தகவலறியும் பசி, ஆவல், வெறி, வேட்கை, .... எப்படித்தான் விவரிப்பது??

"தகவலறியும்" கூட சரிதானா ??

"அறியும்" போதும் என்று நினைக்கத்தோன்றுகிறது...

எதுவாயினும், அவருடைய அறியும் பசி, அகோர பகாசுர ஜடராக்னி..

அந்த அக்னியில் அத்தனையும் ஆஹுதி..

ந்யூஸ் பேப்பர், வார-மாத புத்தகங்கள், ஸ்லோக புத்தகங்கள், கல்யாண பத்திரிகைகள், பக்கோடா-கடலை மடித்த காகிதம், பஸ் டிக்கட்டுகள், பிட் நோட்டீஸ், வால் போஸ்டர்கள், இன்ன பிற மற்றும் எதுவாயினும்...

ஸ்வாஹாஹா....

நெய் ஊற்ற ஹோமாக்னி அணையுமோ?

மேலும் மேலும் கொழுந்து விட்டு தாண்டவமாடி வளர்ந்து ...

மேலும் மேலும் நெய் ஊற்ற...

ஸ்வாஹாஹா.....

ஸ்வாஹாஹா...

ஆஹுதியாகும் எல்லாவற்றையும் ஜீரணித்து தூய பொன்னிறமாய் ஜக ஜகவென்று...

ப்ரகாஸிப்பது ஹோமாக்னியா? அறிவா?

இரண்டும் வேறு வேறா?

விவரிக்க வார்த்தையில்லை என்பதை விட அந்த முயற்சியில் தோல்வி என்பது பொய் கலப்பில்லாதது.

வந்த பேப்பரை யாரும் முதலில் எடுத்துவிட முடியாது. அது அவரது உரிமை.

டீக்கடையில் பழகிய மனிதர் வாங்கிப் போடும் பொறைக்காக வாலாட்டிக் காத்திருக்கும் நாயின் நிலை தான் என் நிலை.

பேப்பர் வந்தவுடன் தான் எத்தனை மரியாதைகள் அதற்க்கு சில வீடுகளில்.

ஏடாகப் பிரியாமல் இருக்க ஸ்டேப்ளர் பின் குத்து...

கோணி ஊசி கொண்டு ட்வைன் நூல் காதணி விழா சில வீட்டில்...

அதோடு நில்லாமல் வீட்டு நம்பரோ உரிமையாளர் பெயரோ பொறிக்கப்பட்டு களவு போகாமல் இருக்க/ களவு போனால் அடையாளம் காண என்று ஜோடனைகள் வேறு...

மதியத்திற்கு மேல் ஆயுள் காலாவதியாகும் வஸ்துவிற்குத்தான் உபசாரம் எத்தனை....

உபசாரம்தான் இத்தனை விதம் என்றால் அதை உபயோகிப்பதிலும்தான் எத்தனை விதம்...

முதல் பக்கத்தில் ஆரம்பித்து கடைசி பக்கம் வரை படிப்பார் சிலர்...

வேறு சிலர், அப்படியே தலைகீழாய் கடைசி பக்கம் ஆரம்பித்து முதலில் முடிப்பார்.

இன்னும் சிலர், அவரவர் அபிமான பக்கத்தில் ஆரம்பித்து (பெரும்பாலும் ஸ்போர்ட்ஸ் பக்கம்) பின் மற்ற பக்கங்கட்க்கு செல்வர்.

வெறும் ஹெட்லைன்ஸ், போட்டோ மட்டும் சிலர் பார்ப்பதுண்டு.

பேப்பரையே பைவ் கோர்ஸ் மீல்ஸ் மாதிரி படிப்பவர் உண்டு. appetizer மாதிரி முதல் ரவுண்டில் ஹெட்லைன்ஸ் தொடங்கி, படிப் படியாய் முன்னேறுவார்கள்.

முதலில் ஹெட்லைன்ஸ் மற்றும் முக்கியமான செய்திகளை நோட்டம் விட்டு, பின்பு மதியம் சாவதானமாய் முழுதாய் வாசிக்கும் ரிட்டையர்டு கோஷ்டியும் உண்டு.

சிலர் எல்லாவற்றையும் கடந்து ஓபிச்சுவரி, வரி விளம்பர Change of Name காலங்களில் ஊடுருவியிருக்கும் நியூமராலஜி மற்றும் மத மாற்றம், மேட்ரிமோனியல் பத்திகளில் பொதிந்துள்ள ஜாதீயம், மற்றும் வெள்ளைத் தோல் விருப்பங்களில் மூழ்கி சமூகக் கவலை கொள்வார்கள்.

இன்னும் சிலர், இவ்வாறு கவலை கொள்வதோடு நிறுத்திக் கொள்ளாமல் கர்ம ச்ரத்தையாய் 'Apropos your article dated...' என்று ஆரம்பித்து பண்டிதத்தனம் நிறைந்த கரடு முரடு வார்த்தைகளில் குமுதம் தலையங்கம் போல "யாராவது ஏதாவது செய்யவேண்டும் என்று எல்லோரும் எதிர்பார்க்கிறார்கள்' என்ற ரீதியில் லெட்டர்ஸ் டு த எடிட்டரில் எழுதி அதை வெளிப்படுத்தவும் செய்வார்கள்.

(நானும் இம்மாதிரி லெட்டர்ஸ் டு த எடிட்டரில் எழுத ஆரம்பித்து, பேப்பரில் பேர் வெளியாக புளகாங்கிதமடைந்து, பின் முற்றி போய் விகடன் மாணவ பத்திரிக்கையாளர் திட்டத்தில் சேர விண்ணப்பித்து, கடைசி கட்டத்தில் நேர்காணலுக்கு விகடன் ஆபீசுக்கு சென்னை சென்று, அங்கு ஆசிரியர் பாலசுப்ரமணியத்தையும், மதனையும் ஆவென்று வாயைப்பிளந்து பார்த்துக்கொண்டிருந்துவிட்டு வெறும் கையுடன் திரும்பியது அனைத்தும் ஒரு தனி வலைப்பதிவிற்கான விஷயங்கள்.)

இதில் ஏதாவதொரு வகை சொல்லப்படாமல் விடுபட்டிருந்தால், அதை சுட்டுபவர்க்கு நமீதா படம் வெளிவராத வெகுஜன வாரப்பத்திரிக்கை படிக்க வாய்க்க பிரார்த்திக்கிறேன்.

பேப்பரின் பிராட் ஷீட் பார்மட்டை முழுவதுமாய் பயன் படுத்துவார் என் தாத்தா. பேப்பரை ஏன் ஏடு என்கிறார்கள் என்பதை என் தாத்தா பேப்பர் படிப்பதைப் பார்ப்பவர்கள் சுலபமாய் புரிந்துகொள்வார்கள்.

ஒவ்வொரு ஷீட்டாய் படித்து அதை தூக்கிப் போடுவார். நான் அதை பிடித்துப் பிடித்துப் படிப்பேன். காட்டில் அரச மரத்தில் வசித்த பிரம்ம ராக்ஷஷன் சாப விமோசனம் பெற வேதத்தை அரச இலையில் தன் ரத்தத்தால் எழுதி கீழே போட அதை எடுத்துப் படித்த சிஷ்யர் போல உணர்ந்தேன்.

இப்போது அவர் இல்லை.

முழுவதாய் எனக்கே எனக்காய் பேப்பர்.

ஆனாலும் அதைப் படிப்பதில் முன்பு இருந்த தீவிரம் சற்று குறைந்திருப்பதாய் உணர்கிறேன். இப்போதிருக்கும் நிலையில், தொண்ணூறு வயதில் என் தாத்தாவிடம் இருந்த தீவிரம் இன்னும் ஐந்து வருடம் கழித்து எனக்கிருக்குமா என்று தெரியவில்லை.

அது வாய்க்க இறைவனிடம் இறைஞ்சுகிறேன்; "more things are wrought by prayer; than this world dreams of..." என்று நம்பிக்கை தரும் டென்னிசனின் வார்த்தைகளைஒற்றி.

Sunday, March 22, 2009

விரல் வித்தை

இந்த தலைப்பை பார்த்தவுடன் உங்களுக்கு ரஜினியின் பாபா முத்திரை, படையப்பாவின் "என் வழி தனீ வழீ...." என்ற விரலசைப்பு, பாட்சாவின் "ஒரு தரம் சொன்னா... நூறு தரம் சொன்ன மாதிரி..." போன்ற வசனங்களுக்கு செய்த விரலசைப்புகள், மற்றும் இன்ன பிற சூப்பர் ஸ்டார் ஸ்டேட்டஸ் துரத்துபவர்களான விஜய்யின் அறை மனது காப்பியும் மற்றும் சிம்புவின் அப்பட்டமான காப்பிகளும் நினைவுக்கு வந்தால் நீங்கள் நிச்சயமாக தமிழ் கூறும் நல்லுலகர் என்று உறுதி படுத்திக் கொள்ளலாம்.

நோக்கம் அதுவல்லவேனினும், you are not way off the mark.

விரல்களைப் பயன்படுத்தி செய்யும் கலைகள் அல்லது கை-வேலைகள் எல்லாவற்றையுமே விரல் வித்தை எனலாம் எனினும் ஆழ்ந்து நோக்கின் ஓவியம், சிற்பம், நாட்டியம் போன்ற நுண்கலைகள் மற்றும் அக்க்யு ப்ரெஷர், வர்மக் கலை போன்றவை விரல் வித்தை எனக் கொள்ள கூடுதல் தகுதி பெறுகிறது. இருப்பினும், முத்ரா எனப்படும் முத்திரைகள் (அதாவது விரல்களால் செய்யப்படும் விதம் விதமான போஸ்கள்) சிறப்பு தகுதி பெற்று விரல் வித்தை என்னும் சொற்றொடர்க்கு தகுதி பெறுகிறது என்று கூறலாம்.

இவ்விதமான முத்திரைகளை நாம் அறிந்தும் அறியாமலும் (சினிமா அல்ல) தெரிந்தும் தெரியாமலும் நம் அன்றாட வாழ்க்கையில் எவ்வாறு பயன் படுத்தபடுகிறது என்பதை முத்ரா விதானம் என்னும் முத்திரைகளைப் பற்றி விளக்கும் புத்தகத்தைப் படிக்கும் பொழுது ஆச்சரியம் எழுவது தவிர்க்க முடியவில்லை.

நாட்டிய முத்திரைகள் பற்றி அவ்வளவாக கூறப்படாத இப்புத்தகத்தில் இடம் பெரும் முத்திரைகள் பெரும்பாலும் யோக மற்றும் ஆன்மீக சம்பந்தமானவையே. முத்ரா விதானத்தில் இடம் பெரும் முத்திரைகள் ஜபம் மற்றும் பூஜை, ஹோமங்களில் பயன்படுத்தப் படும் ந்யாச முத்ரா, அர்க்யஸ்தாபந முத்ரா, ஆவாஹநாதி முத்ரா, ஹோம முத்ரா, நிவேதன முத்ரா என வகைப் படுத்தப் பட்டிருக்கிறது.

சக்தி விகடன், குமுதம் பக்தி முதலான இன்ன பிற ஆன்மீக வார மாத சஞ்சிகைகளை படிப்பவர்கள் கண்டிப்பாக அபய மற்றும் வரத முத்திரைகளைப் பற்றி அறிந்திருப்பார்கள். இருகை கூப்பி பெரியவர்களையோ கடவுளையோ வணங்கும் போது நாம் பயன்படுத்துவது வந்தனீ முத்திரை.

நாம் குழந்தைகளுக்கு வேடிக்கைக் காட்ட சுவரில் நிழலுருவில் விரல்களைக் கொண்டு அசைத்து மான் அல்லது நாய் மாதிரி காண்பித்து செய்யப்படுவது ம்ருகீ முத்திரை. பறவை பறப்பது அல்லது மீன் நீந்துவது மாதிரி செய்து காண்பிப்பது மத்ஸ்ய முத்திரை.

உலக அழகிப் போட்டியில் வலது கையை இடது பக்க மார்பில் வைத்துக் கொண்டு சதா பிளாஸ்டிக் புன்னகைக்கும் ஒல்லிப் பிச்சான் அழகிகள் செய்வது ஹ்ருதய முத்திரை.

சினிமாவில் கதாநாயகியை வில்லன் தகாத எண்ணத்தோடு நெருங்குகையில் மார்பின் குறுக்கே இரண்டு கைகளையும் கட்டிக்கொண்டு வீரிடும்போது செய்யப்படுவது கவச முத்திரை.

இவ்வாறாக நம் அன்றாட வாழ்க்கையில் நாம் பயன்படுத்தும் முத்திரைகள் 'ஹேன்ட் ஜெஸ்சர்ஸ்' அல்லது பொதுவாக 'பாடி லாங்குவேஜ்' என்று தற்காலத்தில் வழங்கப்படுகிறது. எந்தெந்த மாதிரியான சூழ்நிலைகளில் எந்தெந்த ஜெஸ்சர்ஸ் பயன்படுத்தப் பட வேண்டும் அல்லது பயன் படும் என்று விளக்கும் 'பாடி லாங்குவேஜ்' பற்றிய நவீன புத்தகங்களும், கட்டுரைகளும் என்று ஏராளமாக காணக் கிடைக்கிறது. இம்மாதிரியான நூல்களுக்கெல்லாம் முன்னோடி என்று முத்ரா விதானத்தைக் கொண்டால் தப்பில்லை என்றே படுகிறது.

உதாரணமாக, கட்டை விரலை உயர்த்திக் காண்பிக்கும் 'தம்ஸ் அப்' ஸைன் ஒரு பாஸிடிவ்வான ஜெஸ்சராக கருதபபடிகிறது. இந்த 'தம்ஸ் அப்' ஸைநை இருகைகளையும் கொண்டு தசாவதாரத்தில் பாட்டி வேடமிட்ட கமல் தோல் பொம்மைகள் தீயில் பொசுங்கி போன சூழலில் அசினை நோக்கி செய்தது போல செய்தால் அது த்ரைலோக்ய ஸம்மோஹினீ எனப்படும் முத்திரை என்கிறது முத்ரா விதானம். கொஞ்சம் ஆழ்ந்து நோக்கின் இந்த த்ரைலோக்ய ஸம்மோஹினீ என்ற பெயரிற்க்கும் 'தம்ஸ் அப்' ஜெஸ்சரிந் பாஸிடிவ்வான கன்னடேஷனுக்கும் ஏதோவொரு தொடர்பு இருப்பதாகவே தெரிகிறது.

மற்றபடி இந்த முத்ரா விதானம் என்பது முத்ரா விக்யான் (science of mudras) என்றும் ஐந்து விரல்களும் பஞ்ச பூத தத்துவங்கள் என்று தொடங்கி விரல்களின் நுனியில் வெளிப்படும் சக்தி மின்னூட்டம் எவ்வாறு முத்திரைகளால் சீரமைக்கப்பெற்று உடல் பலப்படுகிறது அல்லது உடல் உபாதைகள் குணமாகிறது என்பது வரை ஏராளமான விளக்கங்கள், விஷயங்கள் வலையில் கொட்டிக் கிடப்பதைப் பார்க்கும் போது இதுவும் ஜோசியம் போன்று ஒரு ஸ்யூடோ சயன்ஸ் எனக் கொள்ளலாம் என்றே தோன்றுகிறது. உதாரணமாக, சூன்ய முத்திரையை பயன் படுத்தி செல்பேசி செவிடான காதுகளின் கேட்கும் திறனை திரும்பப் பெறலாம் என்பது தற்காலத்திற்கு ஏற்ற செலவில்லாத, மருந்தில்லாத தீர்வாக கவர்ச்சி காட்டுகிறது.

நிற்க.

இம்மாதிரியான முத்திரைகளினால் பயன்பெற வேண்டும் என நினைப்பவர்கள் இது பற்றி நன்கு அறிந்த மற்றும் தகுந்த பயிற்சி உடையவர்களின் துணை கொண்டு இதில் ஈடுபடுவது சாலச் சிறந்தது. ஏனெனில், 'ம்ருகீ' முத்திரையை தவறாக பயன்படுத்தியதால்தான் "பாபா" படம் ரஜினிக்கு தோல்விப் படமாயிற்று என விஷயம் அறிந்தவர்கள் கூறுவதை ஒதுக்கித் தள்ள இயலவில்லை.

ஆவல் மேலிட, பாடல் ஒளிபரப்புவதற்கு முன்னால் தொ. கா. தொகுப்பாளினிகள் செய்யும் விதம் விதமான விரல் வித்தைகள் முத்ரா விதானத்தில் அடங்குமா என இது பற்றி நன்கு அறிந்த என் பக்கத்து வீட்டு தாத்தாவிடம் கேட்டதில், அதெல்லாம் "சேஷ்டா" விதானத்தில் தான் அடங்கும் என்கிறார்.

Friday, August 22, 2008

நியூஸ் பேப்பர்

அம்மா என்றிருக்கிறது.

இப்படி இளைப்பாற அப்படி என்ன சாதித்தாயிற்று?

பீடிகை ரொம்பவும் பலம்தான்.

என்ன செய்வது? சுவாரஸ்யம் கூட்ட இப்படி ஏதாவது செய்ய கட்டாயம் இருக்கத்தான் இருக்கிறது.

இரண்டு நாள் வேலை நிமித்தம் பெங்களூரு 'டூர் ' சென்று விட்டு வர வேண்டியதாகிவிட்டது. ராப்பயணம். காலையில் வந்து இறங்கியதும்
மளமளவென்று பல்லை தேய்த்து காத்திருந்ததில், பிரசவ வார்டுக்கு வெளியே காத்திருக்கும் சினிமா கணவனின் தவியாய் தவிப்பு போல் உணர்ந்தேன். சமீபத்தில், நண்பனின் இரண்டாம் குழந்தை பிரசவ சமயம் ஆஸ்பத்திரி அருகில் ராயர் மெஸ்ஸில் இடியாப்பம்-வடகறி சாப்பிட்டுகொண்டிருக்க குழந்தை பிறந்த தகவல் வந்தது. உள்ளூர தவித்திருப்பாநோ?

நிற்க.

ஆறேகால் மணிவாக்கில் வீட்டு வாசல்படியில் சத்தம் கேட்டவுடன், எலி பிடிக்க காது விறைப்பாக்கி தயாராய் இருந்த பூனை போல் பாய்ந்து சென்று...

கையில் நியூஸ் பேப்பர். தி நியு இந்தியன் எக்ஸ்ப்ரெஸ்.

அப்போது தான்...

இப்போது இந்த ப்ளாகின் முதல் வரியை படித்துவிட்டு உடனே திரும்புங்கள்...

நான் எக்ஸ்ப்ரெஸ் அபிமானி. இரண்டு மூன்று நாள் தொடர்ந்து படிக்காமல் இருந்தால், வித்ட்ராவல் ஸிம்டம்ஸ் போல் கை நடுங்கும். இன்னும் ஜுரம் வருமளவுக்கு போகவில்லை. அவ்வளவுதான்.

தமிழ் கூறும் நல்லுலகில் பலர் 'ஹிண்டு' படிக்காமல் மலச்சிக்கலில் தவிப்பதுண்டு... அதனால் 'இது சகஜம்' என்று எனக்கு நானே சமாதானம்...

ந்யூஸ் பிரிண்ட் வாசனையுடன் புத்தம் புதிதாய் எனக்கே எனக்காய் அதை எடுத்துப் படிக்கிறேன் இப்போதெல்லாம்.

சிறு வயதில் பேப்பர் படிக்க ஆரம்பித்த போது என் தாத்தாவுடன் போட்டி இருந்தது.

காலை ஆறு மணியளவில் பல் தேய்த்து ரெடியாகி வாசல் திண்ணைக்கு வந்து உட்கார்ந்து விடுவார். காபி திண்ணைக்கு வரும். சூடான காப்பியை நன்கு நுரை போங்க ஆற்றி குடித்து விட்டு இரைக்காக காத்திருக்கும் மலைப்பாம்பு போல உட்கார்ந்திருப்பார.

இந்த சமயத்தில் என் தாத்தாவின் படிக்கும் /தகவலறியும் ஆவல்/பசி/(வெறி?) பற்றி உங்களுக்கு சொல்லியே ஆக வேண்டும்.

Tuesday, August 19, 2008

pillaiyar suzhi

ganaanaam tva.....

started my blog today... with invocations of blessings from lord mahaganapathi...

tvameva kevalam kartaasi...

just out of the blue.... the thought came to me... just did it...

power of HIS sankalpam... (or mine?)

whichever way it is... the journey has just begun...

join me in my journey whenever u can...